Gŵyl Borffor yn codi ymwybyddiaeth o Farwolaeth Sydyn Annisgwyl o ganlyniad i Epilepsi (SUDEP) ac yn casglu dros £1,000 mewn rhoddion

Mae dysgwyr a staff ar draws Coleg Sir Gâr wedi llwyddo i godi’r swm aruthrol o £1,100 i gefnogi Diwrnod Porffor, gan helpu i godi ymwybyddiaeth o epilepsi a SUDEP (Marwolaeth Sydyn Annisgwyl o ganlyniad i Epilepsi) trwy gyfres o ddigwyddiadau creadigol a chynhwysol.

Yn ogystal, ac i gydnabod ymdrechion cymuned y coleg, mae’r elusen wedi cyflwyno tystysgrif i’r coleg yn dathlu’r gwahaniaeth y mae dysgwyr Coleg Sir Gâr wedi’i wneud trwy eu gwaith yn codi arian a chodi ymwybyddiaeth.

Mae cymaint o fyfyrwyr a staff wedi gweithio’n galed yn eu hymdrechion i godi ymwybyddiaeth a chodi arian eleni, o werthiant cacennau cartref y tîm arlwyo i fyfyrwyr celf a myfyrwyr Sgiliau Byw’n Annibynnol yn creu crysau-t porffor wedi’u rhwymo a’u llifo. 

Dechreuodd gweithgareddau Diwrnod Porffor y coleg gyda digwyddiad pontio arbennig yn seiliedig ar y thema borffor a gynlluniwyd i helpu dysgwyr Sgiliau Byw Annibynnol a Dechrau Newydd i astudio SUDEP mewn ffordd hwyliog, ddiddorol a chreadigol, gan archwilio cyfleoedd galwedigaethol ar gyfer y dyfodol ar draws y coleg ar yr un pryd.

Fel rhan o’r digwyddiad, cymerodd myfyrwyr ran mewn gweithdy rhwymo a llifo crysau-t porffor dan arweiniad Rebecca Sellick o adran gelf y coleg. 

Cafodd y dysgwyr gyfle hefyd i gwrdd â’r timau gofal anifeiliaid a mecaneg ceir, archwilio cyfleusterau’r coleg a rhyngweithio ag amrywiaeth o anifeiliaid diddorol.

Yn dilyn llwyddiant y digwyddiad pontio, trefnodd y tiwtoriaid Sgiliau Byw’n Annibynnol Clare George, Alyce Newell a Helen Yates ‘Gŵyl Borffor’ - gŵyl gerddorol gynhwysol sy’n dod â myfyrwyr a staff o bob campws ynghyd mewn dathliad bywiog o ymwybyddiaeth, creadigrwydd ac ysbryd cymunedol.

Roedd yr ŵyl yn cynnwys cerddoriaeth fyw, gwallt a cholur ar gyfer gŵyl, tatŵs glitter, fan hufen iâ ac amrywiaeth o weithgareddau codi arian. Cyfrannodd myfyrwyr a staff hefyd at raffl i ennill hamper â thema borffor, gan brynu eitemau porffor ac addurno hamperi i godi arian ychwanegol tuag at yr ymgyrch.

Meddai Helen Edwards, pennaeth Sgiliau Byw’n Annibynnol yng Ngholeg Sir Gâr: “Chwaraeodd y tîm lles, y staff arlwyo a’r dysgwyr rôl bwysig yn yr ymdrechion codi arian, gyda gwerthiant cacennau a gweithgareddau eraill yn helpu i gynyddu ymwybyddiaeth o SUDEP mewn amgylchedd croesawgar a chynhwysol.

“Dyma’r ail flwyddyn i Helen Yates ddod â’r campysau ynghyd er cof am ei mab i godi ymwybyddiaeth o SUDEP, gyda’r digwyddiad yn parhau i dyfu flwyddyn ar ôl blwyddyn.”

Diolch yn fawr iawn i’r holl fyfyrwyr a staff sydd wedi cefnogi’r digwyddiadau ac wedi helpu i sicrhau llwyddiant ystyrlon yr ymgyrch Diwrnod Porffor eleni.

I gael rhagor o wybodaeth am yr ymgyrch genedlaethol ewch i https://sudep.org.