Prentisiaid Coleg Ceredigion yn profi eu sgiliau adeiladu

Mae llawer o fyfyrwyr a phrentisiaid ledled Cymru yn aros am ganlyniadau Cystadleuaeth Sgiliau Cymru a fydd yn cael eu cyhoeddi yn ystod parti gwylio yng Ngholeg Ceredigion yn ogystal â cholegau a darparwyr hyfforddiant eraill ar hyd a lled y wlad. 

Mae’r rhain yn cynnwys prentisiaid a myfyrwyr o gampws Aberteifi Coleg Ceredigion a gymerodd ran mewn digwyddiad Cystadleuaeth Sgiliau Adeiladu Cymru yn Sir Benfro yn ddiweddar. 

Cynhaliwyd y gystadleuaeth gan Ysbrydoli Rhagoriaeth Sgiliau yng Nghymru, menter a gefnogir gan Lywodraeth Cymru i gefnogi cystadleuwyr o Gymru yn nigwyddiadau Cystadleuaeth Sgiliau Cymru ac i’w helpu i symud ymlaen i gystadlu yn World Skills UK. 

Cymerodd prentisiaid Coleg Ceredigion ran mewn tair disgyblaeth grefft: gosod brics, gwaith saer ar safle, a gwaith asiedydd mainc. 

Roedd y myfyrwyr a’r prentisiaid a gymerodd ran yn cynnwys tri dysgwr gosod brics (lefel tri), dau brentis gwaith coed ar safle, ac un prentis gwaith asiedydd lefel tri. 

Y cystadleuwyr gosod brics oedd Owain Thomas, a gyflogir gan Delme Evans Construction Ltd, Tomos Jac Jenkins, a gyflogir gan Rhodri Hopkins a Jac Raeburn, a gyflogir gan Emyr Hughes Gwaith Cerrig (EH Stonework). 

Y cynrychiolwyr oedd yn cystadlu yn y categori gwaith saer safle oedd Cerith Williams, a gyflogir gan Aled Jenkins - Cartrefi AJ Homes a Steffan Gillies, a gyflogir gan Carpenters Aberystwyth Ltd. 

Yn y gystadleuaeth gwaith asiedydd roedd Harry Williams, prentis lefel tri a gyflogir gan J&E Woodworks Ltd.

Meddai Edward Evans, darlithydd gwaith saer yng Ngholeg Ceredigion sy’n gweithio fel rhan o dîm adeiladu’r coleg: “Cafodd tasgau’r gystadleuaeth eu cynllunio i efelychu safonau go iawn y diwydiant ac roeddent yn gofyn am lefel uchel o ran cywirdeb, cynllunio a rheoli amser. 

“Cafodd y cystadleuwyr gosod brics y dasg o gynhyrchu modiwl gwaith brics cymhleth a oedd yn asesu eu gallu i ddehongli lluniadau, cynnal dimensiynau manwl gywir, a dangos crefftwaith glân a chywir. 

“Roedd gofyn i’r cystadleuwyr gwaith saer ar safle gwblhau cydosodiad gwaith saer manwl a oedd yn profi eu sgiliau mesur, torri ac uniadu. 

“Yn y cyfamser, roedd y gystadleuaeth gwaith asiedydd yn cynnwys cynhyrchu cydran gwaith asiedydd mainc a oedd yn gofyn am gywirdeb, sylw i fanylion, a gorffeniad o ansawdd uchel.

“Cwblhaodd pob prentis Coleg Ceredigion y tasgau a roddwyd iddynt o fewn yr amserlenni a neilltuwyd a thrwy gydol y digwyddiad fe wnaethon nhw ddangos lefelau cryf o ffocws, penderfyniad a chymhwysedd technegol. 

Yn bwysig, fe wnaeth y prentisiaid ymddwyn mewn modd proffesiynol iawn drwy gydol y dydd ac fe wnaethon nhw gynrychioli eu cyflogwyr a Choleg Ceredigion gyda balchder ac aeddfedrwydd.”

Mae cymryd rhan mewn digwyddiadau fel Cystadleuaeth Sgiliau Cymru yn brofiad gwerthfawr iawn i brentisiaid. Mae’n rhoi cyfle iddyn nhw gymharu eu sgiliau gyda’u cyfoedion o golegau eraill ac ennill profiad o weithio o dan amodau cystadleuaeth. 

Mae’r digwyddiad hefyd yn hyrwyddo safonau uchel o ran crefftwaith ac yn annog dysgwyr i wthio eu galluoedd ymhellach o fewn y crefftau maen nhw wedi’u dewis.

Cyhoeddir canlyniadau’r gystadleuaeth yn fyw ar 18 Mawrth fel rhan o noson wobrwyo Ysbrydoli Sgiliau.