Sut mae Llwybr 4 yn helpu myfyrwyr i gamu i fyd gwaith a byw’n annibynnol
Mae Coleg Sir Gâr a Choleg Ceredigion yn cynnig cwrs blwyddyn i fyfyrwyr sydd am gael profiad gwaith a datblygu eu hyder wrth gynyddu eu sgiliau annibyniaeth.
Mae Llwybr 4 Camu i Gyflogaeth yn ymwneud â grymuso dysgwyr i symud tuag at ddyfodol llewyrchus, mwy annibynnol.
Trwy dreulio un diwrnod yr wythnos yn y coleg a dau ddiwrnod mewn amgylcheddau gwaith go iawn, mae myfyrwyr nid yn unig yn dysgu am swyddi, maen nhw’n dod yn rhan o dîm.
Caiff myfyrwyr gefnogaeth gan diwtor ac anogwr swyddi sy’n eu helpu i ysgrifennu CVs, llythyrau eglurhaol, ffurflenni cais ac sy’n dysgu sgiliau cyfweliad.
Mae ennill sgiliau yn yr ystafell ddosbarth megis ymwybyddiaeth o iechyd a diogelwch a chyfathrebu yn hanfodol yn y gweithle ac mae’n helpu gyda pharatoadau gyrfaol a datblygiad personol myfyrwyr.
I’r myfyrwyr hynny nad ydynt yn hyderus ynghylch teithio, gallant elwa ar hyfforddiant sy’n eu helpu i ddarllen amserlenni bysiau a dod yn gyfarwydd â llwybrau bysiau nes bod gan y myfyrwyr yr hyder i’w wneud yn annibynnol.
Mae hyn yn eu helpu i deithio’r tu allan i’w hardaloedd eu hunain a chynyddu eu cyfleoedd cyflogaeth a gwirfoddoli.
Does dim gofynion mynediad ar gyfer y cwrs ond mae angen i fyfyrwyr gael yr awydd i fynd i’r afael â lleoliadau gwaith.
Dyma beth ddywedodd ein myfyrwyr am eu profiad Llwybr 4 – Camu i Gyflogaeth.
“Rwyf wedi mwynhau llwybr 4 yn fawr iawn. Roeddwn i ychydig bach yn nerfus pan ddechreuais i fy lleoliad cyntaf ond gydag amser, rwyf wedi tyfu’n fwy annibynnol a hyderus. Rwy’n mwynhau siarad â chwsmeriaid ac ateb cwestiynau y gorau gallaf. Yn fy ail leoliad dysgais i fwy am drefnu stoc a’u cyflwyno’n ddestlus.”
Nia Hopley (Co-op)
“Mae fy nhaith yn llwybr 4 wedi bod yn brofiad anhygoel hyd yma ac rwy’n teimlo’n hapus i fod ar y cwrs. Mae wedi fy helpu i fagu fy hyder gymaint yn fwy ac rwyf wedi mwynhau mynd i Leekes ar leoliad. Byddwn i’n argymell yn fawr i unrhyw un sydd â diddordeb mewn gwaith adwerthu i gael lleoliad gwaith yn Leekes, ac mae’r staff yn gyfeillgar iawn.”
Shakia Griffiths (Leekes)
“Mae bod yn Llwybr 4 a helpu yn y Co-op, fel siarad â’r staff ar y penset a rhoi cyfeiriadau i gwsmeriaid ar gyfer eiliau a chynhyrchion, wedi fy ngwneud i’n fwy hyderus wrth siarad â phobl newydd a gofyn am help. Hefyd rwy’n fwy hyderus o ran helpu pobl.”
Ci Stather (Co-op)
“Rwyf wedi mwynhau fy mhrofiad Llwybr 4 hyd yma. Rwy’n dysgu sgiliau newydd yn fy lleoliad profiad gwaith ac mae fy hyder wedi tyfu hefyd.”
Regan Philips (Co-op)
