Ystyried Pŵer Prentisiaethau: Pwysigrwydd bod yn bresennol yn Ffair Brentisiaethau’r Senedd

“Mae cael ein cydnabod fel darparwr prentisiaethau o ansawdd uchel yn hanfodol ac mae’r digwyddiad hwn yn rhoi llwyfan i ni siarad â’r bobl sydd â dylanwad wrth yrru’r rhaglenni hyn yn eu blaenau.”  Gareth David, Pennaeth Prentisiaethau.

Gydag Wythnos Genedlaethol Prentisiaethau bellach wedi pasio, mae’n bwysig ystyried pam ei bod hi’n bwysig i Goleg Sir Gâr a Choleg Ceredigion fod yn bresennol yn y Ffair Brentisiaethau a gynhaliwyd yn y Senedd. 

Cafodd y tîm prentisiaethau wahoddiad i fynychu’r Ffair Brentisiaethau a drefnwyd gan Colegau Cymru a Ffederasiwn Hyfforddiant Cenedlaethol Cymru yn ystod yr Wythnos Prentisiaethau. 

Siaradodd Sargeant AS, Y Gweinidog Diwylliant, Sgiliau a Phartneriaeth Gymdeithasol a chyn-brentis ei hun, yn y digwyddiad a gynhaliwyd yn Neuadd y Senedd ym Mae Caerdydd gan y Grŵp Trawsbleidiol ar Brentisiaethau, dan gyd-gadeiryddiaeth Luke Fletcher AS a Joyce Watson AS.

Ymunodd tîm y coleg â cholegau a darparwyr hyfforddiant eraill o bob cwr o Gymru i dynnu sylw at effaith prentisiaethau. 

A’r digwyddiad wedi denu cryn ddiddordeb, mae prentisiaethau’n parhau i gael effaith bwysig a pharhaol ar unigolion a’r diwydiannau y maen nhw’n gweithio ynddynt.

Prentisiaeth Newydd mewn Rheoli Ynni a Charbon

Ymunodd yr Academi Sgiliau Gwyrdd, a ffurfiwyd yn ddiweddar ac sydd wedi’i lleoli ar gampws Gelli Aur, â’r tîm hefyd i arddangos prentisiaeth lefel tri newydd y coleg mewn rheoli ynni a charbon.

Mae Archi Morgan (yn y llun) yn brentis ar y cwrs sy’n gweithio i Andrew Scott Ltd ac roedd hefyd wrth law i siarad yn uniongyrchol ag aelodau’r Senedd am effaith gadarnhaol ei brentisiaeth. 

Gyda Llywodraeth Cymru yn gyfrifol am y cyllid er mwyn hyfforddi prentisiaid yng Nghymru, roedd yn bwysig i’r coleg fod yn rhan o’r dathliad hwn i gefnogi ymrwymiad Llywodraeth Cymru i brentisiaethau a rhoi cyfle i aelodau’r Senedd siarad yn uniongyrchol â phrentisiaid. 

Mae prentisiaid yn cael eu gyrru gan uchelgais a gefnogir gan y diwydiant, yn aml gyda phenderfyniadau sy’n newid gyrfa

Mae’n bwysig parhau i gyfleu’r neges bod prentisiaid yr un mor gryf eu cymhelliad â’r rhai sy’n dilyn llwybrau addysg mwy traddodiadol.

Mae rhai wedi cymryd cam dewr ac wedi newid eu gyrfa a gweld newid yn eu henillion ariannol er mwyn ymuno â diwydiant y maen nhw’n frwdfrydig iawn yn ei gylch.

Gadawodd Matthew Rees-Thomas incwm rheolaidd a gyrfa mewn lletygarwch i ymgymryd â phrentisiaeth mewn gwaith plymwr. 

Ei nod hirdymor yw dod yn gymwys a chofrestredig gyda Gas Safe, ond am y tro mae’n dysgu’r grefft gyda Geraint Williams Limited, gan gyfuno profiad yn y diwydiant ag astudio cymhwyster achrededig.

Gyrru’r Targed o 125,000

Mae Llywodraeth Cymru wedi dathlu cyrraedd 100,000 o brentisiaethau’r tymor hwn gyda maniffesto Colegau Cymru yn anelu at darged newydd o 125,000 ar gyfer y tymor newydd.

Opsiynau Lefel Uwch

I’r rheini sy’n awyddus i ddewis dysgu ar lefel prifysgol fel rhan o’u prentisiaeth, mae prentisiaethau uwch hefyd yn llwybr i’w ystyried. 

Dewisodd Richard Drummond raglen ddysgu seiliedig ar waith oherwydd ei fod eisiau cyfuno profiad ymarferol yn y byd go iawn â dysgu academaidd.

Mae’n astudio cymhwyster lefel pump yn CIPD, sef cymhwyster achrededig lefel prifysgol ar gyfer gweithwyr proffesiynol AD.

Dywedodd Richard fod AD yn canolbwyntio ar bobl, ac iddo ef, mae bod mewn amgylchedd gwaith yn ddysgu hanfodol, sy’n gofyn am sgiliau technegol a rhyngbersonol hefyd.

Gyda nod gyrfa o ddod yn arbenigwr cysylltiadau gweithwyr, mae bod mewn amgylchedd seiliedig ar waith yn cynnig cipolwg iddo ar swyddogaethau AD craidd fel dehongli polisïau, rheoli achosion a chydymffurfiaeth â chyfraith cyflogaeth.

Meddai Gareth David, pennaeth prentisiaethau yng Ngholeg Sir Gâr a Choleg Ceredigion: “Roedden ni’n teimlo ei bod hi’n bwysig cefnogi’r digwyddiad hwn er mwyn helpu i dynnu sylw at effaith prentisiaethau ar sgiliau, cyflogaeth a’r economi.

“Mae cael ein cydnabod fel darparwr prentisiaethau o ansawdd uchel yn hanfodol ac mae’r digwyddiad hwn yn rhoi llwyfan i ni siarad â’r bobl sydd â dylanwad wrth yrru’r rhaglenni hyn yn eu blaenau.” 

I gael gwybod mwy am brentisiaethau, p’un a ydych chi’n ddarpar brentis neu’n gyflogwr chwilfrydig, cysylltwch â apprenticeships@colegsirgar.ac.uk neu ewch i’r dudalen we ar gyfer prentisiaethau.