Myfyriwr yn ennill gwobr Technegydd Cyfrifeg y Flwyddyn

Mae myfyriwr cyfrifeg yng Ngholeg Sir Gâr wedi ennill gwobr Technegydd Cyfrifyddu’r Flwyddyn, Gwobrau Cyllid Cymru, ar gyfer ei astudiaethau AAT a’i rôl gyda darparwyr gofal Ivolve Care & Support.

Mae Brandon Ayres, sy’n 21 oed, yn astudio diploma lefel 4 Cymdeithas y Technegwyr Cyfrifyddu (AAT) mewn cyfrifeg broffesiynol ar gampws Pibwrlwyd y coleg. 

O arweinwyr profiadol i sêr y dyfodol, fe wnaeth digwyddiad Gwobrau Cyllid Cymru wahodd sefydliadau ac unigolion o bob cwr o gymuned gyllid Cymru i enwebu pobl y mae eu gwaith yn wir yn gwneud gwahaniaeth.

Mae llwybr llwyddiant Brandon yn y coleg yn cynnwys ennill arian yn rownd derfynol Cymru o WorldSkills y DU fel rhan o dîm dau-berson, ennill cymhwyster fel terfynydd gwobr WorldSkills 2025 a chael ei gynnwys ar y rhestr fer ar gyfer Prentis y Flwyddyn yng Ngwobrau’r AAT. 

Mae ei waith yn Ivolve Care & Support wedi dod â chlod i Brandon lle mae’n mynd ati’n fwriadol i chwilio am waith ychwanegol, yn diwygio prosesau a gwella systemau presennol ac ar yr un pryd cefnogi cydweithwyr a hyfforddi staff bob amser. 

O fewn blwyddyn, daeth Brandon yn arweinydd cyfrifon taladwy gan ddirprwyo gwaith i eraill wrth barhau i fod â chyfrifoldeb.   

Meddai Rebecca Jeffreys-Carter, darlithydd cyfrifeg Coleg Sir Gâr: “Mae hon yn wobr hollol haeddiannol sy’n tynnu sylw at etheg waith a gwytnwch Brandon. 

“Rwy’n teimlo bod gan Brandon ddyfodol anhygoel o’i flaen yn y diwydiant cyllid ac rwy’n dymuno’r gorau iddo yn ei astudiaethau a datblygiad ei yrfa yn y dyfodol”.

Fe wnaeth ei gydfyfyriwr cyfrifeg Catrin Lewis, sy’n gweithio i Fwrdd Iechyd Prifysgol Hywel Dda, hefyd ennill cymeradwyaeth uchel yng nghategori Prentis Cyllid y Flwyddyn y gwobrau.