Prentisiaid a dysgwyr yn cael eu cydnabod yng ngwobrau clodfawr dysgu seiliedig ar waith

Ailgyfeiriodd Harry ei ffocws o ddysgu yn yr ystafell ddosbarth, nad oedd, gwnaeth ddarganfod, yn addas iddo fe, i ddysgu ymarferol mewn garddwriaeth a gwaith sylfeini. Mae e wedi ymgymryd ag amrywiol leoliadau gwaith er mwyn ennill profiad ac mae ei benderfyniad yn dangos yn y gwaith mae’n ei wneud yng nghanolfannau garddio Farmyard Nurseries lle mae wrthi’n weithredol yn chwilio am fwy o gyfrifoldeb. Mae Harry yn symud ymlaen i gwrs amaethyddiaeth lle mae’n arddangos brwdfrydedd gwirioneddol yn ei faes. 

Mae gan Sean nod clir o ddod yn farbwr a rhedeg ei fusnes ei hun rhyw ddydd.  Mae wedi llwyr berchenogi ei ddatblygiad drwy drefnu ei leoliad gwaith ei hun, ennill cymwysterau ychwanegol a buddsoddi mewn cyfarpar proffesiynol er mwyn ymarfer gartref. O ganlyniad, mae e bellach wedi adeiladu ei gronfa cleientiaid ei hun yng ngweithle ei gyflogwr. 

Mae Fatima wedi dangos ymrwymiad a phenderfyniad eithriadol wrth ddilyn ei nod o ddod yn gynorthwyydd addysgu.  Fe wynebodd hi heriau personol a rhwystrau academaidd ond dangosodd hi ymdeimlad clir o bwrpas trwy gofrestru ar elfen Ddatblygu rhaglen JGW+ lle gwnaeth hi wella ei sgiliau Saesneg er mwyn symud ymlaen i hyfforddiant pellach. Yn annibynnol, fe wnaeth hi sicrhau lleoliad gwaith yn Ysgol Gynradd Penygaer lle mae hi wedi ymrwymo i amserlen 30-awr. Mae hi wedi tyfu o ran hyder ac wedi datblygu sgiliau rhyngbersonol cryf sy’n helpu cefnogi staff a dysgwyr, ac mae hefyd wedi tyfu o ran ei hymroddiad a’i haeddfedrwydd. 

Mae Jessica yn sefyll allan am ei phenderfyniad i lwyddo mewn diwydiant tra chystadleuol. Cwblhaodd hi gwrs lefel dau mewn gosod trydanol ac aeth hi ati i chwilio am brentisiaeth. Mae bellach wedi cyflawni hyn gyda chwmni Amberwell Engineering Services Ltd. Er gwaethaf nifer o droeon anffodus, parhaodd Jessica i ganolbwyntio ar ei nod, gan arddangos gwytnwch, twf ac uchelgais gwirioneddol.  

Mae Noa yn brentis gwaith saer sy’n hyrwyddo’r Gymraeg yn weithredol yng Ngholeg Ceredigion a hefyd yn ei weithle gyda chwmni adeiladu Thomas Macrae Construction. Mae’n creu amgylchedd croesawgar a dwyieithog ac mae wedi cwblhau llawer o’i waith theori yn Gymraeg. Trwy wytnwch, proffesiynoldeb a meddylfryd rhagweithiol, mae wedi trawsnewid rhwystrau iaith posibl yn gryfderau, ac yntau wedi’i yrru gan ei bositifrwydd a’i broffesiynoldeb.

Mae Owain yn gweithio fel prentis gosod brics gyda chwmni Delme Evans Construction, lle mae’n cyfathrebu â chwsmeriaid a chydweithwyr yn Gymraeg, gan wella perthnasoedd yn ogystal ag ansawdd y gwasanaeth. Yn ogystal mae wedi rhagori ar ddisgwyliadau drwy ymgymryd â chymwysterau ychwanegol a chymryd rhan yng Nghystadlaethau Sgiliau Cymru. Caiff ei barchu’n fawr gan ei gyflogwr am ei etheg waith, ei frwdfrydedd a’i ymrwymiad i ddwyieithrwydd. 

Mae Lilly yn brentis trin gwallt gyda salon gwallt Zen lle mae hi’n arddangos gwaith tîm cryf ac yn gwirfoddoli’n rheolaidd ar gyfer cyfrifoldebau ychwanegol, megis mentora dysgwyr lefel un a chefnogi cyfryngau cymdeithasol y salon. Mae hi’n ffynnu mewn amgylchedd dysgu ymarferol ac yn cyflawni safonau uchel yn gyson. Mae Lilly wrthi’n weithredol yn datblygu ei sgiliau drwy hyfforddiant ychwanegol gan gynnwys cyrsiau GHD a Redken ac mae hi wedi adeiladu cronfa gynyddol o gleientiaid yn y salon. 

Mae Siriol yn weithwraig broffesiynol eithriadol sy’n arddangos arweinyddiaeth neilltuol a dull tîm-ganolog cryf yn ei gweithle gyda S4C. Chwaraeodd hi rôl allweddol o ran tywys ei thîm drwy ailstrwythuro sefydliadol mawr, gan ddarparu eglurder a sefydlogrwydd yn ystod cyfnod heriol.  Prentisiaeth CIPD lefel pump sydd gan Siriol ac mae hi wedi bod yn  defnyddio ei dysgu i sbarduno newid sefydliadol cadarnhaol. Yn ogystal mae hi wedi cydbwyso hyn â’i chyfrifoldebau o edrych ar ôl teulu ifanc. Mae ei phenderfyniad, cywirdeb ei chymeriad a’i gallu i gefnogi eraill yn ei gosod ar wahân fel arweinydd uchel ei pharch.