Llwybr Seren yn 6ed Sir Gâr
Beth yw Llwybr Seren?
Llwybr academaidd hynod gystadleuol yw Llwybr Seren yn 6ed Sir Gâr sydd wedi’i gynllunio ar gyfer myfyrwyr uchelgeisiol sy’n anelu at astudio ym mhrifysgolion gorau’r DU a phrifysgolion rhyngwladol.
Os byddwch yn ymuno â’r llwybr, byddwch yn dilyn rhaglen diwtorial benodol sy’n rhoi pwyslais cryf ar ymgysylltiad uwchgyrsiol — gweithgareddau a gynlluniwyd i ddyfnhau gwybodaeth am y pwnc, datblygu chwilfrydedd deallusol, a’ch paratoi ar gyfer astudiaeth ar lefel prifysgol.
Byddwch yn gweithio’n agos gyda Rhwydwaith Seren, gan roi mynediad i chi at ystod eang o gyfleoedd cyfoethogi a phrofiadau academaidd. Drwy’r rhwydwaith hwn, byddwch yn elwa o bartneriaethau â sawl sefydliad blaenllaw, gan gynnwys:
- Rhaglen Lucy Cavendish ym Mhrifysgol Caergrawnt
- Rhaglen Step Up to New College, Coleg Newydd Prifysgol Rhydychen
- Llwybrau i Gaerfaddon a Llwybrau i Fryste
- Mentrau cenedlaethol sy’n cael eu rhedeg gan Ymddiriedolaeth Sutton
Mae’r cyfleoedd hyn wedi’u cynllunio i gryfhau eich proffil academaidd a’ch helpu i baratoi’n effeithiol ar gyfer symud ymlaen i brifysgolion cystadleuol iawn.
Beth fyddwch chi’n ei wneud ar y Llwybr Seren?
Fel myfyriwr Llwybr Seren, byddwch yn dod yn rhan o grŵp tiwtorial pwrpasol, dan arweiniad tiwtor Llwybr arbenigol. Bydd eich tiwtor yn cyflwyno rhaglen wedi’i theilwra i’ch cefnogi i wireddu a chyflawni eich potensial academaidd.
Byddwch yn cymryd rhan mewn sesiynau wythnosol wedi’u hamserlenni, lle byddwch yn cael eich cefnogi i ddatblygu’n oedolyn ifanc uchelgeisiol, llwyddiannus a gwydn. Mae’r sesiynau hyn yn adlewyrchu arddull a disgwyliadau dysgu mewn prifysgolion ac wedi’u cynllunio i’ch herio’n academaidd.
Cyflwynir y sesiynau gan eich tiwtor personol, ochr yn ochr â siaradwyr gwadd dethol a chyn-fyfyrwyr Seren, a fydd yn eich tywys trwy ystod o brofiadau “arddull prifysgol” go iawn.
Drwy gydol y rhaglen, byddwch yn datblygu sgiliau academaidd hanfodol uwch, gan gynnwys:
- Methodolegau ymchwil
- Meddwl beirniadol a dadansoddol
- Trafod a dadlau academaidd
- Hyder, annibyniaeth a sgiliau cyfathrebu
Byddwch hefyd yn cymryd rhan mewn sesiynau pwrpasol i baratoi ar gyfer prifysgol, lle byddwch yn cael cefnogaeth â ffocws pendant o ran:
- Dewis y brifysgol a’r cwrs cywir
- Ysgrifennu datganiad personol
- Paratoi’r cais UCAS gorau posibl
- Deall disgwyliadau prifysgolion cystadleuol
Erbyn diwedd y rhaglen, byddwch wedi’ch paratoi’n dda i wneud dewisiadau uchelgeisiol a gwybodus am eich dyfodol ac i wneud cais i rai o brifysgolion mwyaf cystadleuol y DU a thu hwnt gyda hyder.
Gofynion mynediad
Mae mynediad i Lwybr Seren yn gystadleuol iawn yn 6ed Sir Gâr ac wedi’i gyfyngu i’r 20 proffil academaidd gorau ym mhob blwyddyn. Mae hyn fel arfer yn golygu ennill chwe gradd TGAU A*. Cynigir lleoedd ar sail perfformiad academaidd.
Straeon Myfyrwyr Llwyddiannus
Ela Roberts - Hanes yn Rhydychen
- Ysgol flaenorol: Ysgol Coedcae
- Safon Uwch: Hanes, Astudiaethau Crefyddol, Cymdeithaseg, Bagloriaeth Cymru
- Cymorth a dderbyniwyd: Canllawiau personol ar weithgareddau uwchgyrsiol, ffug gyfweliadau, datganiadau personol
“O’r eiliad y dechreuais yn CSG, roedd fy nhiwtor (Nina) yn ardderchog o ran tynnu fy sylw at nifer o weithgareddau uwchgwricwlaidd… Roedd fy nhiwtor yn yr ail flwyddyn (Dominic) yn anhygoel wrth farcio ymarferion ar gyfer profion derbyn a’m helpu i ail-ddrafftio fy natganiad personol.”
Hannah Freckleton - Seicoleg ym Mhrifysgol Princeton
- Ysgol flaenorol: Ysgol Gyfun Dyffryn Taf
- Safon Uwch: Seicoleg, Cymdeithaseg, Cymraeg, Troseddeg, Bagloriaeth Cymru.
- Cymorth a dderbyniwyd: Cymorth wedi’i deilwra ar gyfer ceisiadau i’r Unol Daleithiau, canllawiau uwch-gwricwlaidd, teithiau
“Wrth i mi wneud cais i brifysgolion yn yr Unol Daleithiau, cefais gefnogaeth anhygoel wedi’i theilwra i’r llwybr ychydig yn wahanol hwn. Aeth fy nhiwtor, Nina, yr ail filltir - gan helpu gyda geirdaon, deall y gwahanol ofynion, a’m cefnogi drwy’r broses gyfan. Gwnaeth eu hymroddiad wahaniaeth gwirioneddol i’m profiad a rhoddodd yr hyder i mi ddilyn llwybr a oedd yn llai cyffredin ymhlith fy nghymheiriaid.”
Erin Mccarthy - Y Gyfraith yng Nghaergrawnt
- Ysgol flaenorol: Bryngwyn
- Safon Uwch: Y Gyfraith, hanes, Llywodraeth a Gwleidyddiaeth, Llenyddiaeth Saesneg a Bagloriaeth Cymru
- Cefnogaeth a dderbyniwyd: Digwyddiadau pontio, ysgrifennu datganiadau personol, ymarfer cyfweliadau
“Yn y coleg cefais lawer o gefnogaeth gyda sut i wneud cais cystadleuol a pha weithgareddau uwchgwricwlaidd fyddai o fudd i mi, fy natganiad personol a’m cyfweliad, a gwnaeth hyn i mi deimlo’n ffyddiog iawn ynghylch y broses.”
Mae tîm Safon Uwch 6ed Sir Gâr Coleg Sir Gâr wedi ennill Gwobr Aur System Perfformiad Safon Uwch (Alps) sy’n rhoi’r coleg ymhlith y 25% uchaf o ysgolion a cholegau sy’n perfformio orau ar gyfer Safon Uwch yng Nghymru a Lloegr.
Mae myfyrwraig Safon Uwch yng Ngholeg Sir Gâr yn paratoi i astudio yn Unol Daleithiau America ar ôl cael ei derbyn i astudio’r celfyddydau breiniol ym Mhrifysgol Princeton.
Cynhaliwyd digwyddiad gwobrwyo yng Ngholeg Sir Gâr i gydnabod llwyddiant academaidd a phersonol myfyrwyr a ddilynodd raglenni Safon Uwch a Mynediad er mwyn cyflawni eu cyrchnodau gyrfaol yn y dyfodol sef astudio yn y brifysgol, sicrhau prentisiaeth uwch neu gamu i fyd cyflogaeth.
